Pa kompania
BON DOET ta é oportunidat perfekto pa mustra ku bo kompania tambe ta kontribuí na un mihó Boneiru. Huntu ku bo koleganan, bo ta registrá pa un djòp ku ta nifiká algu pa boso i ku parse boso dushi tambe pa hasi. Esaki ta un bon alternativa pa ‘teambuilding’: bo ta konosé otro di un manera nobo, haña energia i kisas desaroyá abilidatnan nobo. Bo ta ‘Hasi Bon, Pasa Bon’.
Bo kompania por hasi mas tambe! Por ehèmpel, dor di ofresé material, servisio, kuminda òf kos di bebe gratis òf ku deskuento. Tambe bo por usa bo ret di kontakto pa hasi un djòp mas visibel òf ofresé sièrto èkspertisio. Asina bo ta mustra ku bo kompania ta para fuerte den komunidat.
Pa skolnan
Skolnan tambe ta partisipá aktivamente na BON DOET. Skolnan por hasi trabou den bisendario di skol òf den un bario huntu ku un klas òf ku henter skol. Studiantenan ta eksperensiá kon dushi ta pa hasi algu pa otro hende. E aktividatnan por varia: e por ta un mainta di wega den un kas di kuido, drecha un parke òf yuda ku un proyekto di bario. Asina e dia ta bira un eksperensia edukativo i inolvidabel pa hobennan.