Riba dia 15 i 16 di mart di 2024 BON DOET TEAM den koperashon ku Oranje Fonds ta organisá huntu ku miles di organisashon soshal e evento boluntario di mas grandi den Reino.
Bou di e nòmbernan Aruba DOET, BON DOET, Cura DOET, NLdoet, Saba DOET, Statia DOET i SXM DOET lo hala atenshon riba trabou boluntario i stimulá tur hende pa pone man na obra pa un (parti di un) dia. Anto esei ta bon pa nos tur!
E kurason ku ta bati
Di hopi organisashon soshal ta boluntario ta e kurason ku ta bati. Ku BON DOET, BON DOET TEAM i Oranje Fonds ta mustra kon importante siudadano aktivo ta pa komunidat. Ademas di esei BON DOET ta krea un bon imahen pa trabou boluntario i ta mustra kon agradabel i den bon ambiente trabou boluntario por tuma lugá.
E di 13 edishon di BON DOET
Esaki ta bira e di 13 edishon di BON DOET kaba!
Nos a kuminsá na 2011 ku 31 organisashon i 750 boluntario i aña pasa tabata tin 98 djòp i mas ku 800 boluntario. Klaro ku e aña akí nos ke pone enfoke riba e evento ku ta trese hende huntu pa hasi bon i pasa bon. Nos ta hasi'e huntu! P’esei, inskribí bo djòp òf partisipá komo boluntario.
Organisashon
BON DOET TEAM ta ofresé yudansa, konseho i informashon pa fundashonnan, asosiashonnan i boluntarionan na Boneiru.
NGO Plataforma Bonaire ta sostené BON DOET i ta e Sentro di Boluntario di Boneiru. Pa mas informashon por wak riba www.ngobonaire.org.
Oranje Fonds ta e fondo nashonal mas grandi riba tereno sosial, i ta saka kara di Reino. Kada aña e ta gasta mas o menos € 30 mion na organisashon i proyekto ku ta reforsá unidat soshal na Hulanda i den e parti di Reino den Karibe. Rei Willem-Alexander i Lareina Máxima ta e pareha protektor di e fondo. Pa mas informashon di Oranje Fonds por tira un bista riba www.oranjefonds.nl.