Kiko bo ta gana ku BON DOET?
Ku partisipashon den BON DOET bo isla i bo empresa òf skol ta haña un impulso positivo. Bo ta fortifiká relashonnan lokal i bo ta duna un bon ehèmpel. Esei ta yuda bo imahen. Den bo empresa mes tambe bo por tin bentaha di dje, den forma di trahadó mas motivá, ku bista mas ámplio, ret di relashon nobo i atenshon positivo di medionan di komunikashon sosial ku lo bo haña siendo parti di e publisidat rònt di e evento notabel aki. Pa bo alumnonan esaki por ta un eksperiensha nobo, yudando un organisashon sosial, kisas nan promé partisipashon den trabou boluntario. Ademas di esei e ta un dia inspirativo i agradabel. I di e otro banda tin organisashon sosial ku danki na bo koperashon por realisá meta ku riba nan mes forsa nan lo no por a logra, òf kisas ku mashá difikultat.
Partisipá komo kompania
BON DOET ta un okashon ideal pa bo mustra ku bo kompania ta koperá pa logra un mihó ambiente di bida. Komo empresa bo por skohe por ehèmpel un djòp pa hasi huntu ku bo empleadonan. BON DOET ta un bon alternativa pa e ‘teambuilding’ tradishonal òf dia di rekreo i bo trahadónan ta haña abilidat i eksperiensha nobo. Pero komo empresa bo por hasi mas ku esei. Yuda hasi un djòp eksitoso ofresiendo bo produkto òf servisio gratis òf na preis redusí. Manera fèrf òf otro material, òf ko’i kome pa e boluntarionan. Tambe bo por aktivá bo ret di kontakto, reklutá bo klientenan òf bo relashonnan di trabou.
Partisipá ku bo skol
Klaro ku skolnan tambe por partisipá den BON DOET. Reuní un klas òf henter skol i yuda ku un djòp den boso bario. Pensa por ehèmpel riba un mèrdia di wega ku habitantenan di un kas di kuido, drecha un tereno deportivo òf hasi un beach clean up. Si tin grupo grandi, nos ta konseha pa tuma kontakto fo'i trempan.