E akshon boluntario di mas grandi na Reino
10 i 11 di mart 2017

Aporte finansiero

Kon mi ta pidi un aporte finansiero?

Ta despues ku boso organisashon a inskribí un trabou bo por pidi aporte finansiero. Den “Mi BON DOET’’ bo ta haña bou di bo trabou un kònòpi ku “Aporte finansiero”. Awor, paga tinu! E kònòpi akí ta funshoná sólamente si bo ta buska un mínimo di 10 boluntario i bo a yena bo number di kuenta di banko. Si bo a yena e datonan aki, ku e kònòpi di “Aporte finansiero” bo por download un pdf. Imprimí e formulario akí, yena e datonan ku falta, firm’é i tres’é òf mand’é pa NGO Plataforma Boneiru. Atenshon! Te ku dia 20 di yanüari 2017 por hasi e petishon, pero ta un budget tin i ora esaki a kaba, ta kaba a kaba. Kiermen, no warda te último momentu.

Kondishon pa pidi un aporte finansiero

  1. Bo organisashon ta un fundashon òf sosiedat ofisial ku tin su propio kuenta;
  2. Bo trabou ta riba e website: www.bondoet.com;
  3. E trabou ta pas ku e karakter di BON DOET: riba 10 i/òf 11 di mart 2017 bo organisashon ta buska hende nobo ku ta bai hasi algu konkreto pa bo organisashon;
  4. Pa kada trabou bo ta buska 10 hende mínimo. Di esakinan no mas ku mitar por ta liá na bo organisashon komo boluntario kaba;
  5. Ta 1 aporte finansiero por haña pa kada direkshon/lokalidat;

Atenshon: Nos ke duna mas tantu organisashon posibel un aporte finansiero, pero e presupuesto tin límite. Si bo trabou no ta konta ku tur e puntonan aki riba, bo no por haña finansiamentu. Esei no ta kita ku bo organisashon por partisipá den BON DOET! P’esei inskribí bo trabou lihé. Asina boluntarionan ta haña bo fásil.

Kiko nos ta paga?

  • Material brutu manera fèrf i kos ku mester pa fèrf kuné, palu, waya i staka pa tranké, material di limpiesa, palu i mata, hèrmènt chikitu di metal, èts;
  • Hür di hèrmènt òf aparato grandi manera trapi, mashin di limpia ku preshon, mashin pa koba buraku, skòp i chapi, èts;
  • Ko’i kome i bebe pa tene stoma di hende ku ta traha duru, máksimo $150.

Sólamente pa instituto/organisashon pa persona ku limitashon físiko òf mental

  • Gastu di un eskurshon, manera hür di konvoi i preis di entrada;
  • Pago pa artista manera payaso i kantante, òf pa hasidó di kabei òf di kara den kaso di un dia (òf mèrdia) pa malkriá nan poko: Máksimo $375.-;
  • Den kaso ku bo aktividat ta sea un desayuno, un kuminda mèrdia òf algu por estilo bo por uza e montante kompleto pa kuminda i bibida.

Loke sigur nos no ta kompensá

  • Trabou òf organisashon ku no ta kumpli ku e kriterionan general;
  • Kompra di hèrmènt of kos di uzo;
  • Material pa dòrna e lugá;
  • Premio pa bingo òf otro sorto di wega;
  • Gastu di imprenta òf material di promoshon;

Pidi plaka: atministrashon

Manda e formulario pa pedida di aporte finansiero imprimí pa NGO Plataforma Boneiru. Por pasa tres’é tambe. E direkshon ta Kaya Grandi 52C, Tel: 717 2366. Bo formulario mester ta entregá mas tarda dia 22 di yanüari di 2016. No lubidá di saka un kopia pa bo mes atministrashon. Mas tempran bo pedida ta entregá, mihó. Oranje Fonds tin un máksimo di € 1,5 mion pa gasta pa pedida pa finansiamentu relashoná ku NLdoet, CURA DOET, ARUBA DOET, SXM DOET, STATIA i BON DOET.

E prosedimentu finansiero

Si nos aprobá bo pedida pa BON DOET (Kompleto òf parsial) bo ta haña notifikashon di esei por eskrito. Pa mas tardá kuminsamentu di mart bo por pasa buska bo chèk serka NGO Plataforma Boneiru. Asina bo por hasi bo kompras na tempu.