Konose bo pasado, sa bo presente i fiha bo futuro

Fundashon Kuchara(FK) su partisipashon na Bondoet e bia aki lo ta den kuadro di e proyekto Historia di Sklabitut na Boneiru den pasado. Fundashon Kuchara ta haña ku lo ta bon pa muchanan i hobennan sa mas di nan antepasadonan. Esaki ta pa evitá konfushon i pa no sigui hasi e mésun fayonan sin por komprondé pakiko no tin resultado. FK su lema ta KONOSÉ BO PASADO, SA BO PRESENTE PA BO FIHA BO FUTURO. Den e proyekto aki ta bai hasi aktividatnan ku 2 grupo di enfoke(mucha i hoben 8 te ku 15 aña) ku ta bini for di diferente bario. Total 20 partisipante partí den dos grupo. E proyekto lo ta hopi variá i kargá ku aktividatnan manera bishitá sitionan kaminda katibunan tabata traha, hasi un rekorido riba Boneiru na lugánan kaminda ta mira kasnan di katibunan na e saliñanan di salu parti sùit i tambe parti nòrt ku bishita na Magazina di Rei pa un tayer, skucha charlanan serka personanan i grandinan ku tin hopi informashon, realisá entrevistanan i tambe traha obranan kreativo ku tabata usa den pasado. Nos lo bai tin mester di 10 boluntario. Huntu nos lo logra i union ta hasi forsa!